Gaur egungo etxebizitzen ereduak eta beren prezioek ez diete erantzuten jendartearen beharrei, eta horren aurrean beharrezkoa da eredu berriak diseinatu eta inplementatzea, besteak beste, izaera publiko-komunitarioa izango duten etxebizitzak sustatuz.
Gazteak eta adin nagusiko pertsonak bereziki baztertuta geratzen dira gaur egun indarrean dagoen eskaintzatik. Lehenengoak euren diru-sarrerengatik nagusiki, bigarrenak bestelako zenbait faktorerengatik (irisgarritasuna, herrigunetik urrun bizitzea, bakardadea, beharrak aldatu direlako...). Horregatik pentsatu dugu, bi kolektibo hauek elkarren eskutik joan daitezkeela, kemena eta esperientzia bateratuz, txirikorda bat sortuz.
Horrenbestez, proiektu berritzailea abiatu dugu, gure inguruan estreinakoz, non eta gure herrian. Txirikordak bi helburu nagusiri erantzun nahi die:
- Gazteen emantzipazio beharra.
- Adineko pertsonen etxebizitza eta bizikidetza eredu berrien beharra.
Norentzat?
18 eta 30 urte arteko gazteentzat eta 65 urtetik gorako pertsonak. Emantzipazio fasean dauden gazteei zuzenduta eta dependentziarik ez duten adineko orori.
Non?
Ugartondoko eremuan, Ugarte baserriaren alboan.
Zenbat?
16 etxebizitza.
Jabegoa?
Usurbilgo Udala.
Izaera?
Norberaren beharrak asetzeko etxebizitza pribatuak eta espazio komunitarioak ditu, behar kolektiboak eta belaunaldiarteko elkarbizitza bultzatzeko.
Sartzeko baldintzak?
Kolektiboaren araberakoak dira.
Zenbat denbora bizi naiteke Txirikordan?
Gazteen kolektiboaren kasuan, bost urtez bizi daitezke; ez dira luzagarriak. Adinekoen kasuan, kontratuak bost urterako sinatzen dira, eta luzatu daitezke, gizarte zerbitzuek egindako txostenaren arabera.
Funtzionamendua?
Guztion artean adostu ditugu bertan bizi direnen eta erabiltzaileen betebeharrak eta eskubideak, bai eta zertarako eta nola erabiliko diren espazio komunak ere.
Dokumentuak
Informazio orokorra
Etxebizitzen zerrenda
Harremanetarako
- Informazio gehiago: 943 37 19 51 (Usurbilgo Udala)
- Txirikordako bizilagunekin elkarrizketak lotzeko: txirikorda.usurbil@gmail.com