Ongi etorri gida

Usurbilera bizitzera etortzen direnei zuzendutako ongi-etorri gida duzu honakoa. Alkatearen agurrarekin batera, herriko zerbitzu, ekipamendu nahiz baliabideen inguruko informazioa jasotzen du: guztien kokaguneak zehazten dituen mapa ere txertatu da.

Urteak dira Usurbilgo Udala jatorri aniztasuna, migrazioa eta elkarbizitzaren aldeko lanketan sakontzen dabilela. Horren lekuko dugu Jatorri Aniztasuna eta Elkarbizitza Lantzeko Plana (2021-2025): lanerako bide-orria da udalarentzat, eta bertan jasotzen diren hainbat ekintza burutu dira. Besteak beste, udal teknikarien mahaia eta Aniztasun Kontseilua sortu dira; Kontseilua herriko eragile, talde, norbanako eta jatorri anitzeko kideek osatzen dute.

Bi taldeek, elkarrekin, harrera protokoloa landu dute, eta hainbat dokumentu eratorri dira lanketa horretatik: hala nola, ongi-etorri gida, erroldatzearen garrantzia azpimarratzen duen eskuorria eta oinarrizko hiztegitxoa.

2023an, harrera zerbitzua eskaintzen hasi ginen. Udaleko aniztasun teknikariak harrera egiten die herrira iritsi berriak direnei: hitzordu baten bidez, ongi-etorri gida eta hiztegitxoa ematen zaie, baita herrian dauden zerbitzu eta baliabideen berri eman ere. Beraien beharrak entzun, eta, beharrezkoa izanez gero, beste zerbitzuetara bideratzen dira. Herrira iritsi berriak izanik udaleko erregistrora jotzen duten guztiei eskaintzen zaie zerbitzua, eta interesa dutenei bertan ematen zaie hitzordua.

Usurbilen erroldatzen diren herritarren jatorri aniztasuna aintzat hartuta, gidaren edukiak euskaraz, gaztelaniaz, ingelesez, frantsesez eta arabieraz argitaratu dira.