Hondakinen bilketa atez ate

Informazio bulegoa

Atez atekoari buruzko informazio guztia jasotzeko, eskaerak bideratzeko eta zalantzak argitzeko jo ezazu atez ateko informazio bulegora.

Doako telefonoa: 900 776 776

Whatsapp zenbakia: 606 501 024

Ordutegia: 09:00 - 14:00

Helbidea: Usurbilgo udaletxea. Joxe Martin Sagardia plaza, z/g

E-maila: atezate@usurbil.eus

Ordutegia eta egutegia

Bilketa: herrigunea

Hondakinak uzteko ordutegia: goizeko 6:30 - 8:30*

Egutegia:

* Urteko egutegia aurreko urte bukaeran jakinaraziko du udalak.

Beira jasotzeko ez dago ordutegi eta egutegi jakinik, kaleko iglu berdean biltzen baita.

Landa-eremua: bilketa-guneak

Landa-eremuko bizilagunek bilketa-guneetan uzten dituzte beren hondakinak. Usurbilen hiru bilketa-gune daude. Gune horiek itxiak dira, eta giltza dutenak bakarrik sar daitezke bertara.

Kokapena:

• Aginagan: Sekaina erretegiaren gainean.
• Zubietan: Etarte bidean.
• Atallun: Garbigunearen ondoan.

Larrialdi-gunea

Salbuespen gisara, landa eremuko bilketa-guneak erabili ahal izango dira larrialdi kasuetan, horretarako, erabili nahi dutenek atez ateko informazio bulegotik pasa behar dute euren giltza jasotzeko eskaria betetzera.

Kokapena:

• Aginagan: Sekaina erretegiaren gainean.
• Zubietan: Etarte bidean.
• Atallun: Garbigunearen ondoan.

Bilketa-modua

Organikoa: kubo marroian eta poltsarik gabe, zintzilikatzekoan. Poltsaren ordez sukaldeko papera erabiltzea aholkatzen da. Horrela, kuboa garbi mantentzen da eta usain txarrak ekiditen dira, paperak hezetasuna xurgatzen baitu. Usainen harira, kuboa etxean den artean irekita mantentzea eta arrain hondarrak sukaldeko paperetan biltzea gomendatzen da.

Ontzi arinak: plastikozko poltsan, zintzilikatzekoan. Komertzioetako poltsak berrerabiltzea aholkatzen da.

Papera eta kartoia: paperezko poltsan, kartoizko kaxan edo soka batekin lotuta, zintzilikatzekoan.

Beira: kaleko iglu berdean.

Errefusa: plastikozko poltsan, zintzilikatzekoan.

Etxe-atariko zintzilikatzekoetan herritar bakoitzak bere kakoa du kuboa eta poltsak uzteko.

 
Kaleko zakarrontziak

Usurbilgo kaleetako zakarrontziak atez ateko bilketara egokituta daude: atal ezberdinetan banatuta daude, hondakinak gaika jaso ahal izateko.

Autokonposta eta auzokonposta

Konpostatzea hondar organikoak ongarri bihurtzea da. Prozesu motela da, baina %100 naturala.

Oso erraza da, eta etxean ere egin daiteke. Lur zati txiki bat eta mimo pitin bat besterik ez da behar. Lurrik ez dutenen kasuan, udalak auzokonposta guneak sortuak ditu udalerrian zehar.

Autokonpostatzen duten familiek, %40ko hobaria

Usurbilgo Udalak autokonposta bultzatzen du herritarren artean. Autokonposta egiten duten familiek %40ko hobaria dute hondakinen tasan. Izan ere, udalak ez du etxean konpostatzen duten herritarren organikoa ez biltzen ezta tratatzen ere.

Ikasi konpostatzen

Garbigunea

San Marko Mankomunitateak eskaintzen duen zerbitzua da. Garbiguneak, oro har, herritarrek pertsonalki erabiltzeko dira, hondakinak Mankomunitatearen kide diren udalerrietan sortu badituzte. Usurbilgo garbigunea Atallu industriagunean dago.

Neguko ordutegia

Astelehenetik ostiralera: 10:15-12:50 / 16:00-18:50

Larunbatak: 09:00-12:50

Igandeak eta jaiegunak: itxita

Udako ordutegia

Astelehenetik ostiralera: 10:15-12:50 / 16:00-18:20

Larunbatak: 09:00-12:50

Igandeak eta jaiegunak: itxita

Informazio gehiago: San Markoren webgunea

Garbigune mugikorra

Garbigune mugikorrak errefusaren kuboan gaika bil daitezkeen hainbat hondakin ateratzea du helburu, eta garbiguneko material txikiak bertan botatzeko aukera ematen du.

Garbigune mugikorra astero auzo desberdin batean egoten da, usurbildar guztiek erabil dezaten. Ostegunero mugituko du lekuz udal brigadak. Honakoa izango da kokapenen segida: Zubieta, Kalezar, Usurbilgo kaxkoa, Aginaga, Txokoalde eta Santuenea.

Bota daitezken hondakinak

Hamaika hondakin mota jasoko ditu. Honakoak:

1. Margoak, bernizak, disolbatzaileak, kolak, fitosanitarioak (intsektizidak eta herbizidak), aerosolak eta horien ontziak (beteak, erdi-beteak zein hutsak).
2. Bolumen txikiko plastiko gogorreko materialak (ontzi arinak ez direnak, hauek astearte eta ostiraletan zintzilikatzekoan atera behar dira).
3. Pilak.
4. Tamaina txikiko txatarra (lapikoak, zartaginak, metalezko erretiluak, etab.).
5. Material informatikoak.
6. Bonbilla fluoreszenteak.
7. Etxetresna, aparailu eta jostailu elektriko/elektroniko txikiak.
8. Inprimagailuen tinta kartutxoak eta tonerrak.
9. Material berrerabilgarriak (jostailuak, jolasak, gailu elektriko-elektronikoak...).
10. Kafe kapsulak (poltsa baten barruan).
11. Egur zati txikiak.

Erabilerarako irizpideak

Garbigune mugikorra erabiltzeko zenbait irizpide ezarri dituzte:

• Hondakin mota bakoitzak bere ahoa du, sailkatuta jasotzeko.
• Garbigune mugikorretik kanpo ezin da materialik utzi.
• Utzi nahi den hondakinaren bolumenak ezin du dagokion ahoan ezer sartzea eragotzi: beraz, hondakina ahoa baino handiagoa bada, Atalluko garbigunera eraman behar da.
• Garbigunera eraman beharko da utzi nahi den hondakina material desberdinen nahasketaz osatuta badago.

Kokapen egutegia

  2025eko egutegia deskargatu (PDF)

Fibrozementu bilketa: Garberako garbigunean

Herritarrek Garberako garbigunean utz ditzakete fibrozementuzko edo amianto hondakinak, kantitate txikietan, hileko lehen astelehenean, 10:00etatik 13:00etara eta 15:30etik 18:30era. Izan ere, material arriskutsua izanik, bilketa berezitua behar du: debekatuta dago fibrozementuzko hondakinak kalean dauden zaborrontzien barruan edo aldamenean uztea.

Zenbait baldintza beharko ditu hondakinak bertan utzi ahal izateko: bilduko den materiala ez da hauskorra izango, egoera onean egon beharko du, eta desmuntatzeko beharrik gabe; ibilgailu berezirik gabe garraiagarria eta manipulagarria izan beharko du. Gehienezko neurri eta pisuak ondoko hauek dira:

• 2 fibrozementuzko plaka (4 m2 edo 50 kg arte).
• 3 m-ra arteko hodi zati bat.
• 5 jardinera.
• 30 kg-ra arteko elementu apaingarri edo bereziak.

Hortik gorako kantitateak izatekotan, erabiltzaileek baimen berezia eskatu beharko dute San Marko Mankomunitatean (943 214977). Erabiltzaile partikularrek eramandako hondakinak baino ez dituzte onartuko.

Erabiltzaileek inprimaki bat bete eta NANa aurkeztu beharko dute. Ondoren, euren ibilgailuan joan beharko dute garbigunearen barrura, zeregin horretarako mugatutako eremuraino, eta han artatuko dituzte langile espezializatuek.

Industria poligonoetako hondakinak

Udalak industria poligonoetan bilketa berezitua egiten du, bere frakzio eta egutegi propioarekin. Informazio gehiagorako, bisita ezazu poligonoetako hondakinen inguruko orrialdea.

Gidak eta zalantzak

Emaitzak

Beste erakundeak