Eduki publikatzailea

Udalak Jose Luis Zumetaren ‘Usurbilgo lehoia’ obra erosi du

Udalak erosi berri duen Zumetaren obra 1985ekoa da, figuratiboa eta papiroen bildumakoa: Potxoenean jarri dute. Muralaren 50. urteurreneko egitaraua amaitu berritan erosi du artelana, eta, era berean, Zumeta Arte Estudioak artistaren bi kartel eman dizkio udalari, dohaintzan.

2024·07·10


Usurbilgo Udalak Jose Luis Zumetaren Usurbilgo lehoia obra erosi du, 18.000 euroan, eta Potxoeneko Urdintxo gelan jarri berri du. 1985 urtekoa da obra, papiroen bildumakoa, uhin-kartoia eta tenpera erabilita egindakoa. Zumetaren Usurbilgo muralaren 50. urteurreneko egitaraua amaituta eskuratu du obra udalak, eta, aldi berean, artistaren bi kartel eman dizkio, dohaintzan, Zumeta Arte Estudioak udalari. Hirurak Zumetaren Usurbil erakusketan ikusteko aukera izan zen.

Zumeta batik bat abstrakziorako joeragatik zen ezaguna, baina figurazioan ere hainbatetan ibili zen bere ibilbide artistiko osoan. Esaterako, 1970eko hamarkadaren amaieran, hogei urtez jorratutako abstrakzioa alde batera utzi eta errealismoan eta figurazioan murgildu zen, Zumeta Arte Estudioak azaldu duenez: “1980ko hamarkadaren krisiaren testuinguruan, bai garaiko ekonomiari zegokionez, eta baita pertsonalki ere, 1984 eta 1985 urteetan uhin-kartoia eta tenpera aukeratuko ditu bere unibertsoa adierazteko. Aurreko esperientzietan ezohiko materialak erabilitakoa zen Zumeta, baina 1984 eta 1985 urteetan egin zuen uhin-kartoiaren ezaugarriak ahal bezainbeste probesteko hautua”.

Urte oparoak izan ziren horiek Zumetarentzat, sorkuntzari dagokionez, eta 70 artelanetik gora sortu zituen Papiroak izenpean: bilduma horretakoa da Usurbilgo lehoia. Artelanak berak udal arte bilduma osatzeko interes artistiko berezkoa du, eta, horrez gain, Usurbili erreferentzia zuzena egiten dionez, herriarentzako interesgarri izan daitekeela iritzi dute bi aldeek. Artelana marko batekin babestuta dago, eta horrek kontserbazio lanak errazten ditu.

Udalak Potxoeneko Urdintxo gelan jarri du Zumetaren obra. Gela horretan bazegoen beste artelan bat lehendik, Alejandro Tapiaren Txokoalde, gauez izenekoa. Zumeta Arte Estudioaren aholkuei eutsita, haren lekua hartu du, orain, Usurbilgo lehoia -k, eta aretoaren atzeko horman jarri dute Tapiarena: arreta handiagoa deitzen du orain, eskaileretatik igo ahala lehen begi kolpean ikusten baita.

Zumeta Arte Estudioak, gainera, Zumetaren bi kartel eman dizkio, dohaintzan, udalari. Batek Santixabel festetako bertso saio bat iragartzen du, eta bestea, berriz, Usurbil herri izendatu zuteneko 600. urteurrenaren harira egindakoa da: azken hori Pelaioenean jarriko dute, eta bestearen behin betiko kokapena erabakitzeko dago.

Fitxa teknikoa

Izenburua: 'Usurbilgo lehoia'

Teknika: tenpera

Euskarria: uhin-kartoia

Neurria: 185x270

Urtea: 1985

Bilduma: papiroak

Pintura estiloa: figuratiboa

Ezaugarriak: triptikoa, markoan sartuta