2024·09·23
Usurbilgo Udalak aurtengo asfaltatze kanpainari ekingo dio, aste honetan. Izaera desberdineko hainbat lan egingo dira, herriko hainbat lekutan. Oraingoz, Santuenean egingo diren lanek dute hasiera egun zehatza: asteazkena, irailaren 25a. Horren aurretik, ordea, prestaketa lanak egingo ditu udal-brigadak: gaur bertan hasi dira zeregin horretan. Lanak bata bestearen atzetik egingo dituzte, guneka, eguraldiak baimendu ahala.
Santuenea
Atarien arteko hartxintxarrezko aparkaleku guztiak asfaltatuko dira: 15, guztira. Prestaketa lanak eta asfaltatzea kontuan izanda, lauzpabost eguneko lana izango da, betiere, eguraldiaren arabera. Lanak egin bitartean ezingo da leku horietan aparkatu egunean zehar; gauez, bai. Horrez gain, eskubaloi pistan ere ate bat zabalduko dute, behin-behinean aparkaleku gisa erabili ahal izateko.
Zebra bideak
Hiru zebra bide altxatuko dira: Zumartegi industrialdearen sarreran, Errekatxiki kalean eta Pikaolan. Lehenengo biak Arburu-Tellendegi herri bidea bukatu ostean egingo dituzte. Pikaolakoa, berriz, Iartzako eta Usaskuko petatxu lanekin batera egingo da.
Petatxuak
Iartzaz eta Usaskuz gain, petatxuak jarriko dira, baita ere, Kale Nagusian eta Mercadona supermerkatuaren atzeko bidean.
Udaletxea
Irutasun kalean aparkalekuetako zuloak konpontzeaz gain, udaletxeko sarbidearen irisgarritasun baldintzak hobetuko dira.