2024·07·23
Udal-gobernuak 2023-2027 legealdiaren lehenengo urtearen balorazioa egin du, tarte horretan egindako zein martxan jarritako neurriak nabarmenduta. Udalaren Udalberri aldizkarian argitaratu du balorazioa Agurtzane Solaberrieta Mesa alkateak: 120 neurriko Legealdi Planeko 28 neurri bete (%23) eta beste 38 martxan jarri (%31) dituzte dagoeneko. “Legealdiari ilusioz, gogoz eta indarrez ekiteko prest ginela esan genuen; lan eginez itzuliko genuela hauteskundeetan jasotako babes guztia. Eta horretan ari gara”.
Solaberrietaren esanetan, Legealdi Planeko 120 neurriak “herri bizigarriagoa, zaintzaileagoa, jasangarriagoa eta berdinzaleagoa eraikitzeko” proposamenak dira; “Usurbiltzen jarraitzeko”. Eta, horrekin batera, lehen urtean martxan jarritako zenbait neurri nabarmendu ditu:
- Misioen baitako gobernantza eredua osatzeko prozesua martxan da.
- Trantsizio ekosozialaren herri misioa adosteko parte-hartze prozesua egin da, misioak lortzeko proiektu eraldatzaileak zehaztearekin batera.
- Energiaren bulegoa ireki eta efizientzia energetikoan urratsak egiten ari dira.
- 650 Usurbil Bizi proiektua garatzen ari dira, besteak beste, Zumetaren 50. urteurreneko egitarauarekin.
- Herriko ura ahalik eta etxe gehienetara iristeko lanak egin dira.
- Elkargunearen proiektua definitzeko parte-hartzea abiatu da.
- Txirikorda belaunaldiarteko etxebizitza komunitarioa zabaldu da, eta zaintza ereduaren eraldaketan urrats kualitatiboak egiten ari dira, zaintza plan pertsonalizatuak eskaintzeko.
- Ikasgela zabaldu dute, azterketa garaietarako.
- Etorri berrien edota egoera zaurgarrian egon daitezkeen herrikideen integrazio komunitarioa sustatzeko mentoretza sozialerako HarEman egitasmoa martxan jarri da.
- Pelaioenea ireki dute: Kalezarreko auzo ekipamendua eta Emakumeen Etxea.
- Udal haur eskolaren eredua zehaztu, lizitazio berria burutu, eta eraikina berritzeko prozesua martxan da.
- Usurbil tentsio handiko eremu izendatzeko prozesua abiatu da.
- Kiroldegiko ordutegia zabaldu dute.
- Mugiment sarearekin bat eginda, herritarrek Araba, Bizkai eta Gipuzkoako kiroldegiak erabiltzeko aukera dute.
- Ibaiertzeko eremua zabaldu eta oinezko loturak hobetu dituzte Zumartegin.
- Aginagan: Elutx bidea egin, haur parkea berritu eta Eliza Zaharreko konponketak bideratzen ari dira. Aginaga Biziberritzen sustapen taldearekin mahai iraunkorra osatu dute.
- Etxealdiko irisgarritasun plana gauzatzeko, San Esteban kalea oinezkotu eta Etxealdia eta Kale Nagusia lotuko dituen igogailuarekin lanean hasi dira.
- N634ko autobus geltoki berriak eta Egurtzegi eta Kalezar lotuko dituen igogailuaren obrak amaitu dituzte.
Solaberrietak egindako lana modu positiboan baloratu du: “Emandako hitza betez, konturatzerako joan zaigu lehen urtea”.