2024·05·17
Usurbilgo Udaleko Ingurumen sailak 2023ko hondakinen txostena eta emaitzak argitaratu ditu. Jasotako datuen arabera, gaikako bilketak azken urteetako emaitzen antzekoak izan ditu: %86ko gaikako bilketa izan da Usurbilen 2023. urtean (epe berean, gaikako bilketa %57koa izan da Gipuzkoan, eta %50ekoa, San Marko Mankomunitatean). Hondakinen sorrerari dagokionez, behera egin du biztanle bakoitzeko sortutako hondakin kopuruak, 500 kilo/biztanleko langatik behera jarraituz: 485kilo sortu dira, biztanleko, 2023an, Usurbilen.
Gaika aztertuz gero, paperaren eta kartoiaren beherakada eta industriaguneetako errefusaren igoera nabarmendu behar dira. Pisua kontutan hartuta, bildutako frakzio nagusia biohondakinak izaten jarraitzen du: herrian kudeatzen diren hondakinen %30 izan da bihondakina, auto-konpost, auzo-konpost, baserri-konpost edo bilketa bidez gaika kudeatua izan dena.
Horrez gain, 2023. urtean Europa mailako Zero Zabor ziurtagiria ere mugarri garrantzitsua izan da: Europa mailako emaitzarik onena lortu du Usurbilek, 5 izarretatik 4 erdietsita. Era berean, nabarmentzekoa da 2023an ekitaldi publikoetan hondakinen murrizketa sustatzeko udal zerbitzuek egindako ahalegina: baxera berrerabilgarriaren erabilera bultzatu da herriko festa eta jarduera ia guztietan.
2023ko hondakinen txostena: hemen.
2023ko emaitzak: hemen.