2024·09·19
Urriaren 5ean egingo da Usurbilgo Emakumeon Topaketa, Emakumeon Etxean, goizez. Herriko emakumeek “elkar ezagutu eta sareak jostea” dute helburu, etxearen erreferentzialtasuna handitzearekin batera. Izatez, maiatzean egitekoa zen, baina bertan behera utzi zuten, aurrerago antolatzeko asmoarekin. Antolaketa lanak errazteko, aldez aurretik izena emateko eskatu dute: emakumeonetxea@usurbil.eus / 943 37 71 12.
Topaketako egitaraua ezagutarazi da, gaur goizean. Lehenengo, talde dinamika bat egingo dute, Elhuyarrek gidatuta, elkarren arteko ezagutza bultzatzeko. Tarte hori baliatuko dute, aldi berean, Emakumeon Etxearen webgunea aurkezteko; azken egunotan jarri dituzte martxan, halaber, Emakumeon Etxearen sare sozialak: X, Facebook eta Instagram. Ondoren, Bea Egizabal umoregilearen saioa izango da, eta luntx goxo batekin amaituko da topaketa.
Emakumeon Etxeak jakinarazi duenez, gainera, datorren astean banatuko da, etxez etxe, urtarrilera bitartean izango duen programazioa: ikastaroak ez ezik, zerbitzuak eta kultur ekitaldiak izango dira, ohi bezala.
Emakumeon Topaketa
Urriaren 5ean, larunbata. Emakumeon Etxean.
11:00-13:00 Talde dinamika, Elhuyarrek gidatuta
13:00 Bea Egizabal umoregilea
14:00 Luntxa
