Goi mailako bi kirol hitzordu izango dira, Usurbilen, maiatzaren 17an: Emakume Master Cup-ek antolatzen duen VIII. San Fermin torneoa eta Itzulia Women txirrindularitza lasterketaren hirugarren etapa. Egun eta ordu bertsuan izango dira: 12:00etan hasiko da pilota partida, eta ordu-erdi pasatxo geroago zeharkatuko dute herria Itzulia Women-eko partaideek.

Esku pilotako San Fermin torneoari dagokionez, bi partida jokatuko dira, Usurbilgo frontoian: doan izango dira. Lehenengoa, gazteena izango da: Arruti eta Iparragirre Zabala eta Lizarralderen aurka arituko dira. Bigarrena, elite mailakoa izango da: Etxegarai-Gaminde Sagardui eta Arrillagaren aurka.

Itzulia Women lasterketa maiatzaren 15etik 17ra jokatuko da: hiru etapa izango dira, eta azkenak Usurbil zeharkatuko du; Donostian hasi eta bukatuko da, 113,1 km osatuta. Lasarte-Oriatik iritsiko da lasterketa, eta Aginagara bidea hartuko du, Mendizorrotzeraino: handik Oriora iritsiko da lehenengo eta Donostiara, gero.

Aurreikuspenen arabera, txirrindulariak 12:40 eta 12:55 artean pasatuko dira Usurbildik: ordu erdi lehenago moztuko da trafikoa herria zeharkatzen duen N634 errepiderako sarbideetan.