Abuztuko etenaldiak eragindako bakardadea arintzeko eskaintza egin du udalak, zaintza ekosistemaren barruko zerbitzuen lantaldeak egindako proposamen bati tiraka. Izan ere, udan, eta batik bat abuztuan, hainbat zerbitzu itxi edo eten egiten dira, ordutegiak aldatu, denden ordutegiak murriztu, herria hustu... Errealitate horrek herrian zaintza zerbitzuak jasotzen dituzten herrikideen artean zein sentsazio sortzen dien jakin nahi izan dute, egoera hori pixka bat arintzeko aukerak baloratzeko, eta horren emaitza da abuzturako prestatu duten eskaintza.

Zaintza zerbitzuak jasotzen dituzten herritarrei galdetegi motz bat pasatu zien udalak, udan zein aldarte eta zein ohitura izaten dituzten ezagutzeko, ekintzaren bat antolatuz gero parte hartu nahi luketen eta zer egin nahi luketen jakiteko. Erantzunak esku artean, abuzturako saio batzuk antolatzea erabaki dute zerbitzuen lantaldean. Eskaintza hala sortu bada ere, saiook ez dira soilik zaintza zerbitzuak jasotzen dituzten herritarrentzat, nahi duten guztientzat baizik.

Hala, astean behin, ostiral goizetan, paseo txiki bat eman eta kafe baten bueltan elkartuko dira; oraingoz, 20 herrikide inguruk azaldu dute parte hartzeko asmoa. Herriko frontoian elkartuko dira, 10:00etan: paseo motz bat eman, nork bere erritmoan, eta Artzabalera joango dira gero, kafe bat hartuz euren eguneroko kontuez hitz egiteko, 12:00 bitartean. Monitore baten laguntza izango dute paseoetan.

Gizarte Zerbitzuetara deituta eman daiteke izena. Kaxkora joateko zailtasunak dituzten herritarrentzat garraio zerbitzua jarriko dute: beharrezkoa da aldez aurretik eskatzea, izena ematerakoan.

Gizarte Zerbitzuak: 943 37 71 10.