Auzoetara eta baserrietara garraio publikorik ez iristeak eta, kasu batzuetan, gidabaimenik ez izateak isolamendu arazoak sortzen dituela ikusi ondoren, Usurbilgo Udalak, Behemendi Elkartearen laguntzarekin, herritarren mugikortasuna errazteko zerbitzu berri hau jarri du martxan: auzoetan eta nekazal ingurunean sakabanaturik bizi diren biztanleen bizi-kalitatea hobetzeko BIDEZ BIDE zerbitzua.

BIDEZ BIDE zerbitzuarekin, auzoetan mugitzeko arazo handiak dituzten eta nekazaritza lurretan bizi diren adineko pertsonei aukera eman nahi zaie ezohiko eginkizunak beren kabuz egiteko. Honetarako, furgoneta egokitu baten zerbitzua eskainiko da astelehenetik ostiralera ordutegi eta geltoki finkoekin. Zerbitzu hau herritarrentzat dohainik izango da. Adinagatik edo mugikortasunagatik geltokira iristeko arazorik izanez gero, zerbitzuak eskariaren arabera funtzionatuko du. Honela, zerbitzua telefonoz eskatu eta BIDEZ BIDE etxeraino joango da.