12·02·2026

Martxan dago Etxealdiko igogailua

Amaitu dira Etxealdia eta Kale Nagusia lotzeko igogailuaren obrak: udal-ordezkariek eta auzotarrek elkarrekin estreinatu dute. Igogailura iristeko espaloia eta San Esteban 12 atariarekin modu irisgarrian lotzeko arrapala ere egin dira.

09·02·2026

Lurraldebusek herrian ematen duen zerbitzua hobetzeko zenbait eskaera egin dizkio udalak aldundiari

BU02, BU10 eta UK09 lineatan geltoki berri bana gehitzeko eskatu dio udalak Gipuzkoako Aldundiko Mugikortasun sailari, baita zerbitzuen arteko konexioak hobetzeko eta zenbait geltokiren izendapenak egokitzeko ere.

05·02·2026

Altxutako ontziralekua egiteko emakidaren baldintzak onartu dituzte, aho batez

Udalak Aginagan ontziralekua egiteko Eusko Jaurlaritzaren baimena eskuratu du. Lursaila erosi eta erriorako sarbide publikoa eginda, errioari lotutako eskaintza osatuko du udalak, 650 Usurbil Biziren bidez.

05·02·2026

Autokarabanen aparkalekuak erregularizatzeari buruzko mozioa onartu da, osoko bilkuran

Autokarabanei lotutako ordenantza bat idatzi edo indarrean dagoena egokitzeko konpromisoa hartu du udalak.

05·02·2026

Klimaren eta Energiaren aldeko Europako Alkateen Itun berria berretsi dute, aho batez

Usurbilgo Udalak 2011n egin zuen bat alkateen itunarekin. 2021ean helburu eta konpromiso berriak ezarri ziren itunean, eta horietan berrestearen alde egin du udalbatzak.

30·01·2026

ETS-k tren geltoki berriaren inguruko urbanizazio lanak egingo ditu, otsail eta martxo bitartean

Hiru fasetan urbanizatuko dute tren geltoki berriaren inguruko eremua, Atxega jauregitik aurrerako oinezko bidetik hasita: astelehenean, otsailaren 2an, hastea aurreikusten da. Lanak egin bitartean, parkea itxita egongo da, eta bide alternatiboak erabili beharko dira geltokira joateko.

30·01·2026

Irisgarritasun Unibertsaleko Plan Integrala onartu da, Usurbil “denona eta denontzat” izateko bokazioarekin

Hasieraz eta aho batez onartu da, urtarrileko osoko bilkuran, IUPI Irisgarritasun Unibertsaleko Plan Integrala. Lau urtez izango da indarrean, 2026-2029 artean. Udal gobernuak azaldu duenez, “plan errealista eta gauzagarria” izateko helburuarekin osatu da, udaleko langile zein herritarren ekarpenak jasota.

30·01·2026

Pediatra postua luze gabe betetzeko eskatu dio udalak Osakidetzari

Urtarrilaren 12az geroztik, pediatra falta da Usurbilgo anbulatorioan: herritarren ezinegona eta haserrea helarazi dio udalak Donostialdeko ESI-ari, eta erabaki sendo eta eraginkorrak eskatu dizkio lanpostua berehala bete dezan.

27·01·2026

Zaintzaile profesionalentzako arreta eta aholkularitza zerbitzua eskainiko du Maitelanek

Beterri Buruntza Mankomunitatearekin hitzarmena sinatuta, bere jardunaren berri eman eta herri bakoitzerako eskaintza egingo du Maitelanek. Usurbilen, aurrez aurrekoaz gain, telefono bidezko arreta ere eskainiko du, eta zaintzaile profesionalen bilgunea dinamizatuko du, hilean behin.

22·01·2026

Aginagako saneamendu sarearen zati bat egokitzeko lanak esleitu dira

Otsail hasieran, euri urak eta ur zikinak bereizita jasotzeko lanak abiatuko dira Maioz inguruan. Lanek 22 aste irautea aurreikusten da: ibilbide alternatiboak egokituko dira oinezko eta ibilgailuentzat, bitartean.

22·01·2026

Jabetza eskolako ikastaroetan izena emateko aukera, urtarrilaren 28tik otsailaren 5era

Otsailetik uztailera, jabetza eskolako ikastaroak, liburu aurkezpen eta kultur ekitaldi bana eta aholkularitza zerbitzuak eskainiko dira Emakumeon Etxean. Ikastaroetan izena emateko epea urtarrilaren 28tik otsailaren 5era bitartean izango da.

21·01·2026

Aldaketak trafikoan, Irisasi BTT proba dela eta, igandean

Igandean, urtarrilaren 25ean, Irisasi BTT proba egingo dute, eta hainbat bide mozketa izango dira. Besteak beste, Bizkarreko herri-sarrera itxita egongo da 08:00etatik 14:00etara, eta tarte horretako Donostia-Zumaia autobusak San Inazioko biribilgunean geldituko dira.

20·01·2026

Gaur abiatuko da ‘Goazen kalera!’ ekimena, Aginagan

Jubilatuak eta herriko ikastetxeetako ikasleak elkarrekin paseo bat emateko elkartzen dira, astero: abuztura arteko egutegia prestatu dute, udako paseo motzak barne hartuta.

20·01·2026

Udalak etxebizitza hutsen errolda eguneratuko du, datozen asteetan

Otsailean, udalak gutun bana bidaliko die ustez hutsik dauden etxeen jabeei, eta hutsik ez daudela arrazoitzeko epea emango die, martxoaren 31ra arte: hala egin ezean, %150eko errekargua kobratuko zaie OHZ Ondasun Higiezinen gaineko Zergan. Udalaren kalkuluen arabera, 200 inguru dira herrian hutsik dauden etxeak.

19·01·2026

Zaintzaile profesional zein afektiboentzako saio bana eskainiko da, datorren astean

75 urtetik gorako herritarrei gutun bana bidali die udalak, zaintzaile profesional zein afektiboentzako saioen berri emateko: urtarrilaren 26an izango dira.

16·01·2026

HarEman programan parte hartzeko izen-ematea, martxan

Usurbilera bizitzera etorritako pertsonei herria eta herritarrak bertan errotutako pertsona baten bidez ezagutzen laguntzea da HarEman programaren helburua. Bakarka ez ezik, taldean parte hartzeko aukera dago, Zabalduz kooperatibaren laguntza profesionalarekin.

08·01·2026

Aurtengo Lilatoian ere Usurbilgo Emakumeon Etxearen taldean parte hartzeko proposamena

Usurbilgo emakumeen taldean parte hartzeko argibideak eman ditu Emakumeon Etxeak. Iaz osatu zen taldea lehenengo aldiz, eta 83 emakumek parte hartu zuten.

19·12·2025

Udal-langileen 2025 eta 2026 urteetako soldaten igoera onartu da, aho batez

%2,5eko igoera aplikatuko da aurtengo soldatetan, 2025eko urtarrilaren 1etik aurrerako eraginarekin, eta %1,5eko igoera onartu da 2026rako, urte amaieran beste %0,5 igotzeko aukerarekin, KPI %1,5 edo handiagoa bada.

17·12·2025

Kiroldegiak ordutegi zabalagoa izango du, 2026tik aurrera

Kiroldegia lehenago ireki eta itxiko da lanegunetan, 06:30etik 21:30era, eta asteburuan ordu eta erdi gehiagoz izango da zabalik. Guztira, urtean 96,5 ordu gehiago irekiko da.

17·12·2025

Txokoaldeko zubia ostiralean irekiko da, baina oinezkoentzat eta bizikletentzat soilik

ETS-k udalari jakinarazi dionez, lanak ez dituzte guztiz amaitu, eta berme guztiak izan arte trafikoarentzat ez irekitzea erabaki dute. Taxi zerbitzua eten egingo da larunbatean, zubia oinezkoentzako irekita garraio publikorako sarbidea bermatuta izango baita.