Noticias
Atrás

Buruntzaldeko Ibilbideen XIII. Eguna, urriaren 17an

Lehiatzeko ez den eta edozeinentzat egokia den jarduera fisikoa egiteko Buruntzaldeko hitzordua da. Herri bakoitzean kontrol postuak eta anoak izango dira, baita autobus zerbitzua ere.

13·10·2021


Buruntzaldeko Ibilbideak ospatuko dute igande honetan, urriaren 17an, 08:00etatik 14:00etara bitartean. Iaz, dena antolatu arren, azken momentuan egoera epidemiologikoak okerrera egin zuen eta bertan behera geratu zen. Aurten, zorionez, egoerak hobera egin du, eta Buruntzaldeko Ibilbideen XIII. Eguna egingo dute.

Lehiatzeko ez den eta edozein publiko motarentzat egokia den jarduera fisikoa egiteko aitzakia da hitzordua. Eta, bide batez, Buruntzaldeko eta bere landa-ingurune naturala ezagutzeko. Ohi bezala, bost ibilbide daude aukeran, landako paisaiatik barrena paseoez gozatzeko, belardiak eta basoak zeharkatuz eta baserri, baseliza, karobi eta, natura nahiz kultura aldetik, interesgarriak diren beste leku batzuetara hurbilduz.

Herrietan ibilbide-zati bakoitzaren inguruko trazatuak, profilak eta distantziak erakusten dituzten panelak daude. Bideetan, berriz, norabideak eta distantziak markatzen dituzten geziak eta zuinak. Seinale horiek guztiak udalerri bakoitzaren identifikazio-koloreak aintzat hartuz ipinita daude (Lasarte-Oria: urre zaharra, Urnieta: berdea, Usurbil: laranja eta Andoain: urdina); hala, seinale bat bidean ikusten dugunean zein ibilbidetan gauden jakingo dugu.

Zehazki esanda aukeran dauden ibilbideak ondoko hauek dira:

- ANDOAIN – LASARTE-ORIA (Buruntza mendia zeharkatuz edo gailurra eginda). Koloreak, urdina eta urre zaharra; 7,9 km.ko luzera du; oinez soilik egin daiteke eta mendiko oinetakoa beharrezkoa da.

- ANDOAIN – URNIETA. Koloreak, urdina eta berdea; 4,8 km.ko luzera du; oinez edo bizikletaz egin daiteke eta kirola egiteko oinetakoa beharrezkoa da.

- ANDOAIN – USURBIL (Andatzatik barrena). Koloreak, urdina eta laranja; 14,9 km.ko luzera du (luzeena da); oinez soilik egin daiteke eta mendiko oinetakoa beharrezkoa da.

- LASARTE-ORIA – URNIETA. Koloreak, urre zaharra eta berdea; 3,9 km.ko luzera du; oinez edo bizikletaz egin daiteke eta kirola egiteko oinetakoa beharrezkoa da.

- LASARTE-ORIA – USURBIL – AGINAGA. Koloreak, urre zaharra eta laranja; 9 km.ko luzera du (Santuenetik barrena Aginagako Mapil ingururaino); oinez edo bizikletaz egin daiteke eta kirola egiteko oinetakoa beharrezkoa da.

Buruntzaldeko Ibilbideen egunaren zehaztasunak:

EGUNA: 2021eko urriaren 17a, igandea.

ORDUTEGIA: 8:00 - 14:00 bitartean.

KONTROLAK ETA ANOA: Herri bakoitzean kontrol postuetan ano puntuak egongo dira:

Urnietan: Herriko plazan

Lasarten: Elizatze plazan

Andoainen: Herriko plazan

Usurbilen: Santueneako bidegurutzean eta Agiñako Mapil baserriaren ondoan

LAGUNTZEKO: Navi Ruta izeneko aplikazioa dago, telefono mugikorrentzat egokia dena; honen bidez Buruntzaldeko ibilbideetako edozein egiterakoan, sistemak modu jarraituan emango duen informazioa (kokapena, jarraitu beharreko norabidea, interes-guneak…) jaso ahal izango da. Aplikazioa deskargatzeko eta ibilbide bakoitza aktibatzeko udalerri bakoitzean jarriak dauden paneletan jarritako QR kodeak eskaneatu beharko dira edota herri bakoitzari dagokion klabea ipini.

Andoain: 125

Lasarte: 123

Usurbil: 126

Urnieta: 124

Autobus zerbitzua ere martxan egongo da. Eguerdiko 12:00etan aterako da lehenengo zerbitzua Aginagan (Ezpaldiko Gasolindegian) eta azkena 14:00etan toki berdinean.

Autobusak egingo duen ibilbidea: Aginaga (Ezpaldiko Gasolindegia), Usurbil (San Ignazio biribilgunea), Lasarte-Oria (Dorretxeko biribilgunea), Andoain (Goikoplaza atzealdea) eta azkenik Urnieta (Kiosko geltokia).

Autobusen ordutegiak herri bakoitzeko geltokietan ipiniko dira.

Antolakuntza: Buruntzaldeko udaletako kirol zerbitzuak (Andoain, Lasarte-Oria, Urnieta, Usurbil).

Laguntzaileak:

  • Andatza Mendi Elkartea (Usurbil).
  • Euskalduna Mendigoizale Elkartea (Andoain).
  • Ostadar S.K.T, mendizaleen eta ipar-martxa sailak (Lasarte-Oria).

Arduradun nagusia: Andoain.

Informazio gehiago: Buruntzaldeko kiroldegietara deituz.