21·05·2025
Treba gurasoak programaren lehenengo saioa izango da gaur, maiatzak 21, osasun mentala eta nerabeak gaitzat hartuta: Potxoenean izango da, 17:30ean. Aldundiak eskaintzen duen programa horren bidez, tokian tokiko eragileek landu nahi dituzten gaiak proposatzen dituzte: Usurbilen, Hitz Aho guraso elkarteak eta Gaztelekuak proposatuta antolatzen dira. Doan izan arren, izena ematea beharrezkoa da, Usurbil Kultura webgunean: oraindik zenbait plaza libre daude.
“Osasun mentala eta nerabeak” hitzaldia
Familien eginkizun nagusietako bat da heztea eta seme-alabek balio eta portaera/jarraibide egokiak eskura ditzaten lortzea. Babesaren gakoa da ingurune seguruak eta babesleak sortzea. Ingurune horietan, pertsonak erabat garatu ahal izango dira, beren eskubideak errespetatu ahal izango dira eta edozein indarkeria-motatatik libre egongo dira, haien ongizate fisikoa eta mentala bermatuz.
Hauek dira landuko diren edukiak eta gaitasunak: Gure seme-alaben osasun mentala, nola sentitzen dira? / Zer da osasun mentala? / Zerk kezkatzen gaitu osasun mentaletik? / Adimen emozionalaren garrantzia / Ezegonkortasun emozionala / Zer dira gatazkak? / Detekzio goiztiarra eta babesgabetasuna / Nola lagun diezaiekegu? Familientzako aholku batzuk.
Hurrengo saioak
Ekainak 5. “Kuadrillen saltsak: nerabeen arteko harreman sareak”.
Nerabeentzako saioa, Beñat Benitez trebatzailearen eskutik. Gaztelekuan izango da, 16:30-18:30 bitartean.
Urriak 28. “Gure emozioak kudeatzen, gure seme-alaben bidelagun izateko”.
Haur eta nerabeen gurasoei zuzendutako saioa, Miren Ros trebatzailearen eskutik.
Datak hurreratu ahala jarriko da izena emateko aukera Usurbil Kultura webgunean.