Eduki publikatzailea

Atzealdea

Errenta aitorpena euskaraz egiteko deia egin du udalak

2017ko errenta eta ondarea aitortzeko garaia heldu zaie Araba, Bizkaia, Gipuzkoa eta Nafarroako herritarrei, eta UEMA Udalerri Euskaldunen Mankomunitateak, bertako kide diren udalekin elkarlanean, errenta aitorpena euskaraz egiteko kanpaina jarri du abian. Hain justu, gaurtik aurrera onar daitezke autolikidazio proposamenak. Proposamena onartu behar duzunean, telefonoz edo Internetez, galdetu egingo dizute euskaraz ala gaztelaniaz egin nahi duzun: aukeratu euskara. Handik aurrerako proposamenak eta harremanak euskaraz egingo dizkizute automatikoki Foru Ogasunetik. Usurbilen, 2016an, %27k egin zuten euskararen aldeko hautua.

2018·04·16


2017ko errenta eta ondarea aitortzeko kanpaina betean gaude, eta hori dela-eta, Usurbilgo Udalak, UEMAko gainerako herriekin batera, errenta aitorpena euskaraz egiteko kanpaina abiarazi du. Gaur egun herritarren gehiengo handi batek autolikidazio proposamena jasotzen duela kontuan hartuta, aurten ere horri eman zaio garrantzia. Hain justu, gaur zabaltzen da epea autolikidazio proposamenak onartzeko, eta, horregatik, udalak dei egin die herritarrei, proposamena onartu behar duenean, hala telefonoz nola Internetez, euskaraz ala gaztelaniaz egin nahi ote duten galdetzen dietenean, euskaraz aukeratzea. Hala, handik aurrerako proposamenak eta harremanak euskaraz egingo dituzte Foru Ogasunarekin.

Euskararen aldeko hautua egitea da kanpaina honekin lortu nahi dena. Batetik, datuetan ere isla dadin udalerri euskaldunetan bizi garela, eta, bestetik, administrazioa euskalduntzeko bidean eragiten jarraitzeko. Usurbilen, pixkanaka bada ere, gora ari da egiten errenta aitorpena euskaraz egiten duten herritarren kopurua: 201ean, 591 usurbildar izan ziren (% 17,44); 2013an, gora egin zuen nabarmen kopuruak, eta 738k egin zuten euskaraz (% 22,22); 2015ean, 872k, hots, % 27,09k; eta, 2016an, 893k (% 27,59).

Opariak irabazteko aukera

Andoain, Astigarraga, Hernani, Lasarte-Oria, Urnieta eta Usurbilgo udaletako euskara-batzordeek ere errenta aitorpena euskaraz egitera animatu nahi dituzte herritarrak. "Autolikidazio proposamena onartzerakoan, euskara sakatu", nabarmendu dute. Halaber, Buruntzaldeko udalek argitaratu duten albistea elkarbanatuz gero, opariak eskuratzeko aukera izango da.

Informazio gehiago: euskara.buruntzaldea.eus

www.uema.eus